പ്രവാസം

പ്രവാസം

ഒരുത്തി

ശരിക്കും ഒരുത്തി തന്നെ.

കാസർഗോഡ് നിന്നും

തിരുവനന്തപുരത്തേയ്ക്കുള്ള

യാത്രയിൽ;

പെരുമഴയായതു കാരണം

പല വീടുകളുടേയും
കുടിലുകളുടേയും

വരാന്തയിൽ കയറി നിന്നു.

എവിടുന്ന്, നിർദാക്ഷിണ്യം

ഉടമസ്ഥർ അവളെ

ആട്ടിപ്പുറത്താക്കി.

ഒരു വിദേശവിമാനത്തിൽ കയറി

അവൾ നാടുവിട്ടു.

ചെന്നു കയറിയത്

ഒരു പ്രവാസി മലയാളിയുടെ

ജോലി സ്ഥലത്ത്.

അവിടെ ബ്രൂകോഫിയിൽ

വിറയൽ മാറ്റി അവളിരുന്നു.

ഇതെന്റെ ഭാഷയെന്നയാൾ

പരിചയപ്പെടുത്തിയപ്പോൾ

സുഹൃത്തുക്കളവളെ

തൊഴുതു കടന്നു പോയി.

അപ്പോഴവളുടെ

കണ്ണുനീരിലെ ഭാവപ്പകർച

പകർത്താൻ കഴിയാതെ

ഞാൻ തിരിച്ചു നടന്നു.